السلطة الغزاوية ( الدَقة الغزاوية )

السلطة الغزاوية ( الدَقة الغزاوية )
lol!

السلطة الغزاوية ( الدَقة الغزاوية ) 81501_1299083510

مقدمة:
الكل بعرف الغزازوة مشهورين بالفلفل .. وأكيد ما في طبخة أو أكلة إلا وبدخل في تركيبها الأساسي الفلفل .. والغزازوة عرفوا على مر العصور بمحبتهم الكبيرة للفلفل وانفتاح شهيتهم لأكل الفلفل مع أي طعام .. وفي ناس إلهم خاطر ياكلوا مع الحلويات فلفل ..

السلطات:
عنا كتير من أنواع السلطات اللي انشهرت في العالم .. مثل السلطة التركية والسلطة المصرية والسلطة الغزاوية .. وأنواع تانية ملهاش أصل زي سلطة الطحينة وسلطة الملفوف وسلطة المايونيز .. كل واحد بخترعله سلطة وبسميها على كيفه.. وهية توضع على السفرة لفتح الشهية ومرات زيادةاطباق

ما علينا ..

اليوم أنا قررت أعمللكم وأعلمكم طريقة عمل الدقة الغزاوية المشهورة ..
الدَقة << بفتح الدال .. ومشتقة من دق يدق دقاً .. دوق دوق دوق

أو بمعنى آخر ..

السلطة الغزاوية

أول اشي وقبل كل اشي عشان تكمل معنا بدك زبدية
أكيد ما في بيت فلسطين بيخلى من الزبدية الفخار..
وحتى الفلسطينيين اللي عايشين برة ببعتوا يوصوا توصاية على زبدية من غزة
واللي في غزة أكيد كل بيت فيه أقل شي زبديتين تلاتة ..
وبعدين كلها حقها شيكل مش مستاهلة يا بخلا ..
وللناس اللي ما عندها زبدية إحنا مستعدين نبعتلهم على البريد السريع زبدية
بس هما يتحملوا تكاليف النقل

وللي ما بعرفوا شكل الزبدية هي صورتها ..

وكمان مطلوب مدقة خشب..
مدقة حديدة ما بتنفع
مدقة عضم ما بتنفع
مدقة بلاستيك ما بتنفع

أو ممكن هما ينفعوا بس مش عارف ليش المدقة الخشب إلها معزة خاصة في قلبي ..
يمكن لأني زمان انطبشت فيها

بلاش فضايح .. هي صورة المدقة ..

ولما نجمعهم مع بعض الزبدية والمدقة بصيروا زي هيك

هلقيت نخش على مكونات الدقة..

أول وأهم عنصر من مكونات الدقة هوة الفلفل..
احنا بنحبها عبارة عن فلفل بطعم السلطة
عشان هيك بنحطش عيها أقل من 10 قرون فلفل ..
طبعاً الفلفل على حسب الرغبة .. مش شرط يعني عشر قرون فلفل.. بس أكيد من دون فلفل ما بتزبط ..

ملاحظة: لو ما كنت غزاوي تحاولش تجرب هالعدد من الفلفل.. واللي بحب يخاطر في حاله أنا بخلي مسئوليتي عنه

وأكيد من مكونات الدقة البندورة ..
بكفي 3 حبات على الـ 10 قرون الفلفل .. أو برضو على حسب الرغبة

بصلة صغيرة أو نص بصلة وسط أو ربع بصلة كبيرة

معلقة عين جرادة ..

معلقة ملح..

زيت زتون..

جبنة بيضا .. للتزيين .. وممكن نستغني عنها.. بس الجبنة بلدية من غنم البيارة

يعنى الطعم غير شكل جنة فلسطين ما فى متل طعمها

زتون حب .. حسب الرغبة.. ولازم يكون بعد من زيتون ارضنا الطيبة

طريقة التحضير

يقطع الفلفل في الزبدية قطعاً صغيرة بس مش كتير بالسكينة طبعاً..

وبعدين بنحط معلقة الملح ..

وبعدين معلقة عين جرادة

وبنقطع البصلة إرباً إرباً ..

وبنمسك المدقة وبنبدا ندق ..

ملاحظة: هادي إيدي اللي ماسك فيها المدقة

وبنستمر في الدق ..

[size=25]

ايش تعبتوا ..؟
لسة ضايل كمان .. دق دق يخو ..

والله شكلكم تعبتوا من الدق ..
لسة استمروا .. لحد ما يندق الفلفل والبصل كويس..
أيواااا .. هيك كويس ..

هلقيت بنقطع البندورة فوق الفلفل ..

وبنكمل مسيرة الدق ..

وكمان بنضل ندق ..

وضلك دق لحد ما تندق البندورة كويس مع الفلفل والبصل .. بس دير بالك تتطرشق .. يعني البندورة بدها شوية هدوء في الدق وشوية تفغيص

وهلقيت على حسب الرغبة بنفرك الجبنة البيضا فوق الدقة ..
مش واحد يجيبلي جبنة فيتا ولا جبنة البقرات التلاتة اللي في الكرتون .. ما بتنفع
بتجيب جبنة بيضا بلدية يا غنمية ..

وبنحط زيت الزتون ...

وبصير عنا منظر الزبدية هيك في الآخر..

وبتتاكل بالخبز طبعاً مش بالمعلقة وولا بالشوكة والسكينة كمان
مع شوية زتون ..
بصير منظر الإشي زي هيك ..

طريقة الأكل

بتقسم الرغيف.. وبتبدا الهجوم..
وبتضلك تغرف .. تغرف .. لحد ما تخلص الزبدية .. وتصير تلحوس فيها ..

أنظر الصور

صحتين على البكم الى اللقاء بطبق غزاوى فلسطينى جديد